Мұғалім: Мағзиев Қанат Задаханұлы

ШҚО, Тарбағатай ауданы

«Ақмектеп орта мектебі»КММ

Сынып: 6

Сабақтың мақсаттары:

Білімділік:  Күзгі табиғат әсемдігін көре білуге баулу.  Күз айларындағы табиғат өзгерістерін, құбылыстарын бейнелеуге үйрету. Живопись өнерінің пейзаж жанры туралы білімдерін тереңдету.
Дамытушылық: Бояу түстері арқылы салынған суреттер бойынша оқушының ой - өрісін, қиялын дамыту, шығармашылық қабілеттерін өрістету, сурет салуға икемділік дағдыларын қалыптастыру. 
Тәрбиелік: Оқушылардың туған жердің табиғатын аялауға, елін, жерін сүюге, оны қорғауға баулу.
Сабақтың көрнекіліктері: Күз көрінісі бейнеленген плакаттар,  тақырып жазылған плакат, слайдтар.
Құрал -жабдықтар: Формат А3, акварель бояуы,  қарындаш, өшіргіш.
Сабақтың түрі:  Аралас сабақ
Сабақтың әдісі: Түсіндіру, көрсету, үйрету, сұрақ - жауап  INSEPT әдісі.
Сабақтың барысы:

I. Ұйымдастыру кезеңі  

Оқушылармен амандасу, оқушыларды түгелдеу, құрал -жабдықтарын тексеру, назарларын сабаққа аудару.
II .Жаңа сабаққа даярлық

-Балалар, біз бүгін «Пейзаж. Күз көрінісі» атты жаңа сабағымызды бастаймыз. Сабақ бастамас бұрын қағаз, қарындаш, өшіргіш, акварель бояуын, қылқаламдарыңды дайындап алайық. Енді күз көрінісінің салыну жолдарына, бояу тәсілдеріне үңілейік.
III. Жаңа сабақ
-Бейнелеу өнері неше түрге бөлінеді? (графика, живопись, мүсін, сәндік қолданбалы өнер, сәулет өнері)

-Осы өнер түрлерінің қайсысы бояу түрлерін көп қажет етеді? (бояу түрлерін живопись кескіндеме өнерінде қолданамыз)
-Живопись деген не? (живопись - жазықтық бетінде бояу түрлері арқылы орындалатын көркем шығарма)

-Живопись орындалу ерекшеліктеріне қарай бірнеше жанрға бөлінеді? Натюрморт, Портрет, Тарихи жанр, Батальдық жанр, Маринистік жанр, Анималистік жанр,
Пейзаж жанры. (оқушыларға слайдтағы сурет бойынша көрсетіп түсіндіреді.) Живопись өнерінің пейзаж жанрына тоқталамыз.
Пейзаж жанры – табиғат көрінісін бейнелеген көркем шығарма. Жылдың төрт мезгілі бар. Олар: күз, қыс, жаз, көктем. Алтын күз келді. Жапырақтар сарғайып, жерге түсіп жатыр. Жерге сары кілем төсеп қойғандай жұп-жұмсақ болып тұр. Күз мезгілін «алтын күз» деп айтатын себебіміз айналаның бәрі сары түске айналады. Яғни, бүгінгі сабағымызда күз мезгіліне тоқталамыз. Күз қызықтарына не жетсін! Күз табиғаты, күзгі дала көріністері де алуан түрлі. Табиғат көрінісін бейнелеуде алыс, жақын, астында, үстінде, жанында ұғымдарын қалыптастыратын перспектива заңдылықтарын міндетті түрде білуіміз керек. Бірінші зат бізден неғұрлым алыс тұрса, ол соғұрлым кішкентай болып көрінеді.
«Перспектива» латынның тасадан көру деген сөзінен шыққан. Қазақша ұғымы «көрініс» дегенге келеді. «Перспектива» ұғымын дұрыс білмесек, алыстағы, жақындағы заттар бірдей салынған болып шығады.
Сурет салу 3 - кезеңге бөлінеді.
1 - кезең - Ең әуелі көкжиек сызығын көлденең жүргізген соң төменгі бөлігі жер беті болып есептеледі. 1 - ші тауларды, тау етегіндегі ағаштарды қарындашпен салу керек. 2 - ші ағаштарды, өзенді, көпірді саламыз. Ал өзен төмендеген сайын кеңейте түсеміз.

2 - кезең - Тау, ағаш, шырша, өзен, көпірдің көлеңкелерін де кеңістікте бейнелеп көрсету керек. Алыстағы көріністердің бояулары, сұйық және көмескілеу, кейбір жерлері қоюлау болып боялады. 
3 кезең - Қалған боялмаған көріністерді толығымен бояп, пейзаждың толық көрінісін аяқтаймыз.
IV. Оқушылармен өзіндік жұмыс: Кескіндеме пәні сабағына байланысты тест алынады. Тест үлгілері: 1. Балама жауаптары бар тест 2. Таңдамалы тест 3. Толықтыруды қажет ететін тест.
Тест үлгілері:
I .Балама жауаптары бар тест.
1 Негізгі түстер - үшеу
а) иә  б) жоқ
2. Акварель - суда еритін мөлдір бояу
а) иә  б) жоқ
3. Белгілі көңіл күйді беретін бірнеше түстер жиынтығы түстер гаммасы
а) иә  б) жоқ
II .Таңдамалы тест
1. Түстер шеңберінде бір - біріне қатар орналасқан бояу түстері
а) қарама - қарсы түстер
ә) қосымша түстер
б) жақын түстер
2. Бояу араластыратын тақта
а) пастель
ә) палитра
б) нобай
3. Қазақ халқының қымыз құятын ыдысы
а) ожау
ә) кесепқап
б) торсық
III. Толықтыруды қажет ететін тест
1. Бейнелеу өнерінде жансыз заттар мен бұйымдарды бейнелейтін көркем шығарманы.................................................. дейміз
2. Түс және бояумын алуан тәсілдер қолданылатын бейнелеу өнерінің түрін............................................................... дейміз
3. Дайындық суреттері.................................... деп аталады.
V. Сабақты қорыту: Жаңа сабақты қорыта келе біз «Пейзаж. Күз көрінісі» туралы және салыну жолдарымен таныстық.

А) Сұрақ -жауап
- Біз бүгінгі сабақта не үйрендік?
-Жыл мезгілі нешеге бөлінеді?
-Кімге қай жыл мезгілі ұнайды?

-Күз мезгілінде табиғатта қандай құбылыстар болады?
-Күз мезгілі несімен көңілді?

Ә) INSEPT әдісі

VI .Бағалау. Сабаққа жақсы, белсенді қатысқан оқушыларды атап айтып, жақсы салынған суреттерді көрсетіп, мадақтау арқылы бағалау.